ಮುಂಬೈ: ಬಾಲಿವುಡ್ ನಟ ಸಲ್ಮಾನ್ ಖಾನ್ ಮನೆ ಮೇಲಿನ ಗುಂಡಿನ ದಾಳಿ, ಎನ್‌ಸಿಪಿ ಮುಖಂಡ ಬಾಬಾ ಸಿದ್ದಿಕ್ ಬರ್ಬರ ಹತ್ಯೆ ಮತ್ತು ಇತ್ತೀಚಿನ ಹೈಪ್ರೊಫೈಲ್ ಬೆದರಿಕೆ ಪ್ರಕರಣಗಳ ಹಿಂದೆ ಕುಖ್ಯಾತ ಗ್ಯಾಂಗ್‌ಸ್ಟರ್ ಲಾರೆನ್ಸ್ ಬಿಷ್ಣೋಯ್ ಹಾಗೂ ಆತನ ನೆಟ್‌ವರ್ಕ್ ಪ್ರಮುಖ ಪಾತ್ರ ವಹಿಸಿದೆ. ಕಳೆದ ಮೂರು ವರ್ಷಗಳಿಂದ ಮುಂಬೈ ಸೇರಿದಂತೆ ದೇಶಾದ್ಯಂತ ಈ ಗ್ಯಾಂಗ್‌ನ ಅಟ್ಟಹಾಸ ಮುಂದುವರಿದಿದೆ. ಆದರೆ, ಇಷ್ಟೆಲ್ಲಾ ಗಂಭೀರ ಅಪರಾಧ ಕೃತ್ಯಗಳು ನಡೆದಿದ್ದರೂ ಮುಂಬೈ ಪೊಲೀಸರಿಗೆ ಬಿಷ್ಣೋಯಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲು ಸಾಧ್ಯವಾಗುತ್ತಿಲ್ಲ. ಕೇಂದ್ರ ಸರ್ಕಾರದ ಕಠಿಣ ಆದೇಶವೇ ಅಡ್ಡಿ: ಲಾರೆನ್ಸ್ ಬಿಷ್ಣೋಯ್ ಪ್ರಸ್ತುತ ಗುಜರಾತ್‌ನ ಅಹಮದಾಬಾದ್‌ನಲ್ಲಿರುವ ಅತಿ ಸುರಕ್ಷಿತ ಸಾಬರಮತಿ ಜೈಲುನಲ್ಲಿದ್ದಾನೆ. ಈತನನ್ನು ಯಾವುದೇ ಕಾರಣಕ್ಕೂ ಜೈಲಿನಿಂದ ಹೊರಗೆ ಕರೆತರದಂತೆ ಕೇಂದ್ರ ಗೃಹ ಸಚಿವಾಲಯ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದೆ. 2023ರ ಆಗಸ್ಟ್‌ನಲ್ಲಿ ಸಿಆರ್‌ಪಿಸಿ ಸೆಕ್ಷನ್ 268ರ ಅಡಿಯಲ್ಲಿ ಈ ನಿಷೇಧ ಹೇರಲಾಗಿದ್ದು, ಪ್ರಸ್ತುತ ಜಾರಿಗೆ ಬಂದಿರುವ 'ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ' (BNSS) ಸೆಕ್ಷನ್ 303ರ ಅಡಿಯಲ್ಲಿ ಈ ಆದೇಶವನ್ನು ಮತ್ತಷ್ಟು ಕಠಿಣಗೊಳಿಸಲಾಗಿದೆ.

ಸಾರ್ವಜನಿಕ ಶಾಂತಿ ಕಾಪಾಡುವುದು ಮತ್ತು ಜೈಲಿನಿಂದ ಕರೆದೊಯ್ಯುವಾಗ ಸಂಭವಿಸಬಹುದಾದ ಭೀಕರ ಗ್ಯಾಂಗ್‌ವಾರ್ ತಡೆಯುವುದು ಈ ಕಾನೂನು ರಕ್ಷಣೆಯ ಮುಖ್ಯ ಉದ್ದೇಶವಾಗಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

ವಿಡಿಯೋ ಕಾಲ್ ಮೂಲಕವೇ ವಿಚಾರಣೆ: ಈ ಕಠಿಣ ಕಾನೂನಿನ ಕಾರಣದಿಂದಾಗಿ, ದೇಶದ ಯಾವುದೇ ನ್ಯಾಯಾಲಯ ಪ್ರೊಡಕ್ಷನ್ ವಾರಂಟ್ ಹೊರಡಿಸಿದರೂ ಅಥವಾ ತನಿಖಾ ಸಂಸ್ಥೆಗಳು ಕಸ್ಟಡಿಗೆ ಕೋರಿದರೂ ಬಿಷ್ಣೋಯಿಯನ್ನು ಜೈಲಿನಿಂದ ಹೊರಗೆ ತರುವಂತಿಲ್ಲ. ಒಂದು ವೇಳೆ ಪೊಲೀಸರು ವಿಚಾರಣೆ ನಡೆಸಲೇಬೇಕಾದರೆ, ನೇರವಾಗಿ ಸಾಬರಮತಿ ಜೈಲಿಗೆ ಭೇಟಿ ನೀಡಬೇಕು ಇಲ್ಲವೇ ವಿಡಿಯೋ ಕಾಲ್ ಮೂಲಕ ಮಾತ್ರ ಪ್ರಶ್ನಿಸಲು ಅವಕಾಶ ನೀಡಲಾಗಿದೆ. ಛೋಟಾ ರಾಜನ್‌ಗೂ ಸಿಕ್ಕಿತ್ತು ಇಂಥದ್ದೇ ರಕ್ಷಣೆ: ಈ ರೀತಿಯ ವಿಶೇಷ ಕಾನೂನು ರಕ್ಷಣೆಯನ್ನು ಪಡೆಯುತ್ತಿರುವ ಏಕೈಕ ವ್ಯಕ್ತಿ ಲಾರೆನ್ಸ್ ಅಲ್ಲ. ಈ ಹಿಂದೆ 2015ರಲ್ಲಿ ಭೂಗತ ಪಾತಕಿ ಛೋಟಾ ರಾಜನ್‌ನನ್ನು ಗಡೀಪಾರು ಮಾಡಿದಾಗಲೂ ದೆಹಲಿಯ ತಿಹಾರ್ ಜೈಲಿನಲ್ಲಿ ಇದೇ ರೀತಿಯ ಬಿಗಿ ಭದ್ರತೆ ಒದಗಿಸಲಾಗಿತ್ತು. ಮುಂಬೈ ಪೊಲೀಸರಲ್ಲೇ ಕೆಲವರು ಭೂಗತ ಲೋಕದೊಂದಿಗೆ ನಂಟು ಹೊಂದಿದ್ದಾರೆ ಎಂಬ ಕಾರಣಕ್ಕೆ ರಾಜನ್‌ಗೆ ಈ ರಕ್ಷಣೆ ನೀಡಲಾಗಿತ್ತು. ಅದೇ ರೀತಿ ಬಿಷ್ಣೋಯಿಯ ಕಿರಿಯ ಸಹೋದರ ಅನ್ಮೋಲ್ ಬಿಷ್ಣೋಯಿ ಕೂಡ ಇದೇ ಕಠಿಣ ನಿಯಮಗಳಡಿ ಭದ್ರತಾ ವಲಯದಲ್ಲಿದ್ದಾನೆ. ಪಂಜಾಬ್, ರಾಜಸ್ಥಾನ, ಮಹಾರಾಷ್ಟ್ರ ಸೇರಿದಂತೆ ಅಂತಾರಾಷ್ಟ್ರೀಯ ಮಟ್ಟದಲ್ಲೂ ತನ್ನ ಅಪರಾಧ ಸಾಮ್ರಾಜ್ಯವನ್ನು ವಿಸ್ತರಿಸಿರುವ ಬಿಷ್ಣೋಯ್, ಜೈಲಿನ ಕತ್ತಲಕೋಣೆಯಲ್ಲಿ ಕುಳಿತೇ ತನ್ನ ಇಡೀ ಕ್ರೈಮ್ ನೆಟ್‌ವರ್ಕ್ ಅನ್ನು ಸಮರ್ಥವಾಗಿ ಆಪರೇಟ್ ಮಾಡುತ್ತಿರುವುದು ತನಿಖಾ ಸಂಸ್ಥೆಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.