ಖಾನಾಪುರ: ತಾಲೂಕಿನ ಅರಣ್ಯ ಪ್ರದೇಶದ ವ್ಯಾಪ್ತಿಯಲ್ಲಿ ಕಳೆದ ಒಂದು ವಾರದಿಂದ ಬೀಡುಬಿಟ್ಟಿರುವ ಆನೆಗಳ ಹಿಂಡು ಇದೀಗ ಕೃಷಿ ಜಮೀನುಗಳಿಗೆ ಲಗ್ಗೆ ಇಡುತ್ತಿದ್ದು, ರೈತರು ಹಾಗೂ ಸಾರ್ವಜನಿಕರಲ್ಲಿ ತೀವ್ರ ಭೀತಿ ಸೃಷ್ಟಿಸಿದೆ. ಬುಧವಾರ ರಾತ್ರಿ ಪಾಲಿ ಗ್ರಾಮದ ಭತ್ತದ ಗದ್ದೆಗಳಲ್ಲಿ ಏಕಾಏಕಿ 7 ಆನೆಗಳು ಪ್ರತ್ಯಕ್ಷವಾಗಿದ್ದು, ಇವುಗಳನ್ನು ಮರಳಿ ದಟ್ಟಾರಣ್ಯಕ್ಕೆ ಓಡಿಸಲು ಅರಣ್ಯ ಇಲಾಖೆ ಸಿಬ್ಬಂದಿ ಇಡೀ ರಾತ್ರಿ ಹರಸಾಹಸ ಪಡುವಂತಾಗಿದೆ. ಖಾನಾಪುರ ತಾಲೂಕಿನ ಪಾಲಿ, ಹೆಮ್ಮಡಗಾ, ಅಬನಾಳಿ, ಡೊಂಗರಗಾವ ಹಾಗೂ ಶಿರೋಳಿವಾಡಾ ವ್ಯಾಪ್ತಿಯಲ್ಲಿ ಕಳೆದ ಕೆಲ ದಿನಗಳಿಂದ ಕಾಡಾನೆಗಳ ಸಂಚಾರ ದಟ್ಟವಾಗಿದೆ. ಆಹಾರ ಮತ್ತು ನೀರಿನ ಹುಡುಕಾಟದಲ್ಲಿ ಹಳಿಯಾಳ, ಕ್ಯಾಸಲ್‌ರಾಕ್, ಜಗಳಪೇಟೆ, ತಿನೈಘಾಟ್ ಹಾಗೂ ಗಣೇಶಗುಡಿ ಭಾಗದಿಂದ ಈ ಗಜಪಡೆ ಖಾನಾಪುರ ಭಾಗಕ್ಕೆ ವಲಸೆ ಬಂದಿರಬಹುದು ಎಂದು ಶಂಕಿಸಲಾಗಿದೆ. ಈ ಹಿಂಡಿನಲ್ಲಿ ಒಂದು ಬಲಿಷ್ಠ ಒಂಟಿಸಲಗ ಹಾಗೂ ಎರಡು ಪುಟ್ಟ ಮರಿ ಆನೆಗಳು ಸೇರಿವೆ. ರಾತ್ರಿಯಿಡೀ ಕೂಂಬಿಂಗ್ ಕಾರ್ಯಾಚರಣೆ ಬುಧವಾರ ರಾತ್ರಿ ಪಾಲಿ ಗ್ರಾಮದ ಭತ್ತದ ಗದ್ದೆಗೆ ನುಗ್ಗಿದ ಆನೆಗಳನ್ನು ಬೆದರಿಸಿ ಕಾಡಿಗೆ ಅಟ್ಟಲು ಅರಣ್ಯ ಇಲಾಖೆ ತೀವ್ರ ಕಾರ್ಯಾಚರಣೆ ನಡೆಸಿತು. ಎಸಿಎಫ್ ಬಸವರಾಜ ವಾಳದ ಹಾಗೂ ಆರ್‌ಎಫ್‌ಒ ಸಯ್ಯದಸಾಬ್ ನದಾಫ್ ನೇತೃತ್ವದಲ್ಲಿ ಸಿಬ್ಬಂದಿ ರಾತ್ರಿಯಿಡೀ ಕೂಂಬಿಂಗ್ ನಡೆಸಿದರು. ಪಟಾಕಿ ಹಾಗೂ ಮದ್ದುಗಳನ್ನು ಸಿಡಿಸಿ ಶಬ್ದ ಮಾಡಿದರೂ ಆನೆಗಳು ಜಗ್ಗದೆ ಗದ್ದೆಗಳ ಆಸುಪಾಸಿನಲ್ಲೇ ಠಿಕಾಣಿ ಹೂಡಿದ್ದು, ಅರಣ್ಯಾಧಿಕಾರಿಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ರಸ್ತೆಬದಿಯಲ್ಲೂ ಆನೆಗಳು: ಬೆಚ್ಚಿಬಿದ್ದ ಬೈಕ್ ಸವಾರರು ಪಾಲಿ ಬಳಿಯ ಮುಖ್ಯ ರಸ್ತೆ ಬದಿಯಲ್ಲೇ ಆನೆಗಳ ಹಿಂಡು ಕಾಣಿಸಿಕೊಂಡ ಪರಿಣಾಮ ಆ ಮಾರ್ಗವಾಗಿ ಸಂಚರಿಸುತ್ತಿದ್ದ ಬೈಕ್ ಸವಾರರು ದಿಗ್ಭ್ರಮೆಗೊಂಡು ಆತಂಕಕ್ಕೀಡಾದ ಘಟನೆಯೂ ನಡೆದಿದೆ. ಸದ್ಯ ಆನೆಗಳ ನಿಖರ ಚಲನವಲನ ಹಾಗೂ ಅವುಗಳ ಇರುವಿಕೆಯ ಜಾಗವನ್ನು ಪತ್ತೆಹಚ್ಚಲು ಅರಣ್ಯ ಇಲಾಖೆ ಡ್ರೋನ್ ಕ್ಯಾಮೆರಾಗಳ ಮೊರೆ ಹೋಗಿದ್ದು, ಸ್ಥಳದಲ್ಲಿ ಸಿಬ್ಬಂದಿ ಹದ್ದಿನ ಕಣ್ಣಿಟ್ಟು ಕಾವಲು ಕಾಯುತ್ತಿದ್ದಾರೆ.

ಅರಣ್ಯ ಇಲಾಖೆಯಿಂದ ಕಟ್ಟುನಿಟ್ಟಿನ ಎಚ್ಚರಿಕೆ "ಗ್ರಾಮಸ್ಥರು ಯಾವುದೇ ಕಾರಣಕ್ಕೂ ಆನೆಗಳ ಬಳಿ ಸುಳಿಯಬಾರದು. ಅವುಗಳನ್ನು ಬೆದರಿಸಲು ಕೂಗಾಟ ನಡೆಸುವುದು, ಪಟಾಕಿ ಸಿಡಿಸುವುದು ಅಥವಾ ಕಲ್ಲು ತೂರುವಂತಹ ಸಾಹಸಕ್ಕೆ ಕೈಹಾಕಿದರೆ ಆನೆಗಳು ಮತ್ತಷ್ಟು ಆಕ್ರಮಣಕಾರಿಯಾಗುವ ಅಪಾಯವಿದೆ. ಆನೆಗಳ ಸಂಚಾರ ಕಂಡುಬಂದಲ್ಲಿ ತಕ್ಷಣವೇ ಇಲಾಖೆಯ ಗಮನಕ್ಕೆ ತರಬೇಕು." — ಎನ್.ಇ. ಕ್ರಾಂತಿ, ಉಪ ಅರಣ್ಯ ಸಂರಕ್ಷಣಾಧಿಕಾರಿ (ಡಿಸಿಎಫ್)