BELAGAVI: ಕಬ್ಬಿಗೆ ಬೆಂಬಲ ಬೆಲೆ (MSP) ಹಾಗೂ ರಾಜ್ಯ ಸಮ್ಮತಿ ಬೆಲೆ (SAP) ತಕ್ಷಣವೇ ಘೋಷಣೆ ಮಾಡುವಂತೆ ಆಗ್ರಹಿಸಿ ಬೆಳಗಾವಿ ಜಿಲ್ಲೆಯಲ್ಲಿ ರಾಜ್ಯ ಸರ್ಕಾರದ ವಿರುದ್ಧ ಕಬ್ಬು ಬೆಳೆಗಾರರು ಬೃಹತ್ ಹೋರಾಟಕ್ಕೆ ದುಮುಕಿದ್ದಾರೆ. ಮೂಡಲಗಿ ತಾಲೂಕಿನ ಐತಿಹಾಸಿಕ ಗುರ್ಲಾಪೂರ ಗ್ರಾಮದಿಂದ ಚಾಲನೆ ಪಡೆದುಕೊಂಡಿರುವ 'ಜೈಲ್ ಚಲೋ ಚಳುವಳಿ'ಯಿಂದಾಗಿ ಗಡಿ ಜಿಲ್ಲೆಯಲ್ಲಿ ರೈತರ ಆಕ್ರೋಶ ಮುಗಿಲುಮುಟ್ಟಿದೆ. ರೈತ ಹೋರಾಟಗಾರರಾದ ಶಶಿಕಾಂತ ಗುರೂಜಿ ಹಾಗೂ ಚುನ್ನಪ್ಪ ಪೂಜಾರಿ ಅವರ ನೇತೃತ್ವದಲ್ಲಿ ಆರಂಭಗೊಂಡಿರುವ ಈ ಬೃಹತ್ ಪ್ರತಿಭಟನೆಯಲ್ಲಿ ಲಕ್ಷಾಂತರ ರೈತರು ಭಾಗವಹಿಸಿದ್ದು, ಸರ್ಕಾರದ ರೈತವಿರೋಧಿ ನೀತಿಗಳ ವಿರುದ್ಧ ಸಮರ ಸಾರಿದ್ದಾರೆ. ಸಾವಿರಾರು ಭಾಜನಗಳ ಬೈಕ್ ರ‍್ಯಾಲಿ ಹಾಗೂ ಬೃಹತ್ ಪಾದಯಾತ್ರೆಯ ಮೂಲಕ ಕೃಷಿಕರು ರಸ್ತೆಗಿಳಿದಿದ್ದಾರೆ. Subheading: ಹಿಂಡಲಗಾ ಜೈಲಿನತ್ತ ಧಾವಿಸುತ್ತಿರುವ ಲಕ್ಷಾಂತರ ರೈತರು ಮೂಡಲಗಿಯ ಗುರ್ಲಾಪೂರ ಗ್ರಾಮದಿಂದ ಆರಂಭಗೊಂಡ ಪಾದಯಾತ್ರೆಯು ಕಬ್ಬೂರ ಹಾಗೂ ಹತ್ತರಗಿ ಮಾರ್ಗವಾಗಿ ಬೆಳಗಾವಿಯ ಪ್ರಸಿದ್ಧ ಹಿಂಡಲಗಾ ಕೇಂದ್ರ ಕಾರಾಗೃಹದತ್ತ ಮುನ್ನಡೆಯುತ್ತಿದೆ. ಕಬ್ಬಿನ ದರ ನಿಗದಿಯಲ್ಲಿ ಸರ್ಕಾರ ವಿಳಂಬ ನೀತಿ ಅನುಸರಿಸುತ್ತಿರುವುದನ್ನು ಖಂಡಿಸಿ ಸಾವಿರಾರು ರೈತರು ಸ್ವಪ್ರೇರಣೆಯಿಂದ ಬಂಧನಕ್ಕೊಳಗಾಗಲು ಜೈಲಿನತ್ತ ಸಾಲಾಗಿ ಸಾಗುತ್ತಿದ್ದಾರೆ.

"ಸಕ್ಕರೆ ಕಾರ್ಖಾನೆಗಳು ಹಾಗೂ ಸರ್ಕಾರ ಸೇರಿ ರೈತರ ಶ್ರಮವನ್ನು ಲೂಟಿ ಮಾಡುತ್ತಿವೆ. ಕಬ್ಬಿಗೆ ನ್ಯಾಯಯುತ ಎಮ್‌ಎಸ್‌ಪಿ ಮತ್ತು ಎಸ್‌ಎಪಿ ದರ ಘೋಷಿಸುವವರೆಗೆ ನಮ್ಮ ಜೈಲ್ ಭರೋ ಚಳವಳಿ ಹಿಂಪಡೆಯುವ ಪ್ರಶ್ನೆಯೇ ಇಲ್ಲ. ಸರ್ಕಾರ ತಕ್ಷಣ ಸ್ಪಂದಿಸದಿದ್ದರೆ ಹೋರಾಟ ಮತ್ತಷ್ಟು ತೀವ್ರಗೊಳ್ಳಲಿದೆ." ಎಂದು ಪ್ರತಿಭಟನಾ ನಿರತ ರೈತ ನಾಯಕರು ಎಚ್ಚರಿಸಿದ್ದಾರೆ.

ಬೃಹತ್ ಪಾದಯಾತ್ರೆ ಹಾಗೂ ಬೈಕ್ ರ‍್ಯಾಲಿಯ ಹಿನ್ನೆಲೆಯಲ್ಲಿ ಕಬ್ಬೂರ-ಹತ್ತರಗಿ ರಾಷ್ಟ್ರೀಯ ಹೆದ್ದಾರಿ ಹಾಗೂ ಬೆಳಗಾವಿ ನಗರ ಸಂಪರ್ಕಿಸುವ ಪ್ರಮುಖ ಮಾರ್ಗಗಳಲ್ಲಿ ಸಂಚಾರ ದಟ್ಟಣೆ ಉಂಟಾಗಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ಪೊಲೀಸ್ ಇಲಾಖೆಯು ಬಿಗಿ ಭದ್ರತೆ ಹಾಗೂ ಡ್ರೋನ್ ಕ್ಯಾಮೆರಾಗಳ ಮೂಲಕ ಕಣ್ಗಾವಲು ವಹಿಸಿದೆ.