BELAGAVI: ಮುಖ್ಯಮಂತ್ರಿ ನೇತೃತ್ವದಲ್ಲಿ ನಡೆಯಬೇಕಿದ್ದ ಉನ್ನತ ಮಟ್ಟದ ಕಬ್ಬು ಬೆಳೆಗಾರರ ಸಭೆಯ ಸಭಾಂಗಣವೇ ರಣಾಂಗಣವಾಗಿ ಮಾರ್ಪಟ್ಟ ಆಘಾತಕಾರಿ ಘಟನೆ ಬೆಳಗಾವಿಯ ಸುವರ್ಣಸೌಧದಲ್ಲಿ ನಡೆದಿದೆ. ಕಬ್ಬಿನ ಬೆಲೆ ನಿಗದಿ ವಿಚಾರವಾಗಿ ಕೋಡಿಹಳ್ಳಿ ಚಂದ್ರಶೇಖರ ಹಾಗೂ ಚೂನಪ್ಪ ಪೂಜಾರಿ ನೇತೃತ್ವದ ರೈತ ಸಂಘಟನೆಗಳ ಬಣಗಳ ನಡುವೆ ತೀವ್ರ ಮಾತಿನ ಚಕಮಕಿ ನಡೆದು, ಕೊನೆಗೆ ಪರಸ್ಪರ ಗಾಜಿನ ಲೋಟಗಳನ್ನು ಎಸೆದು ಹೊಡೆದಾಡಿಕೊಂಡಿದ್ದಾರೆ. ಸುವರ್ಣಸೌಧದ ಸಭಾಂಗಣದಲ್ಲಿ ಆಯೋಜಿಸಲಾಗಿದ್ದ ಈ ಪ್ರಮುಖ ಸಭೆಗೆ ರಾಜ್ಯದ ವಿವಿಧ ಭಾಗಗಳಿಂದ ನೂರಾರು ರೈತ ನಾಯಕರು ಆಗಮಿಸಿದ್ದರು. ಸಭೆ ಆರಂಭಕ್ಕೂ ಮುನ್ನ ಸಭಾಂಗಣದಲ್ಲಿ ಸರಿಯಾಗಿ ಕುಡಿಯುವ ನೀರು ಹಾಗೂ ಚಹಾದ ವ್ಯವಸ್ಥೆ ಮಾಡಿಲ್ಲವೆಂದು ರೈತರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ಈ ವೇಳೆ ವಾತಾವರಣ ತಿಳಿಗೊಳಿಸಲು ಮುಂದಾದ ರೈತ ನಾಯಕ ಚೂನಪ್ಪ ಪೂಜಾರಿ, ಎಲ್ಲರನ್ನೂ ಸಮಾಧಾನಪಡಿಸಿ ಭಾಷಣ ಮಾಡಲು ಆರಂಭಿಸಿದರು. ಆದರೆ ಅವರ ಹೇಳಿಕೆಯೊಂದರಿಂದ ಪರಿಸ್ಥಿತಿ ತೀವ್ರ ವಿಕೋಪಕ್ಕೆ ತಿರುಗಿತು. Subheading: ಸಭಾಂಗಣದಲ್ಲಿ ಗ್ಲಾಸ್ ತೂರಾಟ, ಸೂಟ್‌ಕೇಸ್ ಗಿರಾಕಿ ಆರೋಪ! ಭಾಷಣದಲ್ಲಿ ಚೂನಪ್ಪ ಪೂಜಾರಿ,

"ಈ ವರ್ಷ ಪ್ರತಿ ಟನ್ ಕಬ್ಬಿಗೆ ಕನಿಷ್ಠ ₹4,500 ಬೆಲೆ ಪಡೆದೇ ತೀರಬೇಕು"

ಎಂದು ಕರೆ ನೀಡಿದರು. ಇದರಿಂದ ಕುಪಿತಗೊಂಡ ಕೋಡಿಹಳ್ಳಿ ಚಂದ್ರಶೇಖರ ಬಣದ ರೈತರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿ, "ನೀವು ಹೊರಗಡೆ ₹5,500 ನಿಗದಿ ಮಾಡಬೇಕೆಂದು ಹೋರಾಟ ಮಾಡುತ್ತೀರಿ, ಒಳಗೆ ಬಂದ ತಕ್ಷಣ ₹4,500 ಕ್ಕೆ ಒಪ್ಪಿಕೊಳ್ಳುತ್ತೀರಾ? ನೀವು ಸೂಟ್‌ಕೇಸ್ ಗಿರಾಕಿ" ಎಂದು ಬಹಿರಂಗವಾಗಿ ಗಂಭೀರ ಆರೋಪ ಮಾಡಿದರು. ಈ ಮಾತಿನಿಂದ ಕೆರಳಿದ ಚೂನಪ್ಪ ಪೂಜಾರಿ ಬೆಂಬಲಿಗರು ಕೋಡಿಹಳ್ಳಿ ಬಣದ ರೈತನ ಮೇಲೆ ಏಕಾಏಕಿ ಮುಗಿಬಿದ್ದರು. ಮೇಜಿನ ಮೇಲಿದ್ದ ನೀರು ಕುಡಿಯುವ ಗಾಜಿನ ಗ್ಲಾಸ್‌ಗಳನ್ನು ಪರಸ್ಪರ ಎಸೆದು ಹಲ್ಲೆಗೆ ಯತ್ನಿಸಿದರು. ಸಭಾಂಗಣದಲ್ಲಿ ತೀವ್ರ ಗಲಾಟೆ ಮತ್ತು ನೂಕಾಟ ಉಂಟಾಗಿ ಸ್ಥಳದಲ್ಲಿದ್ದ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಕಂಗಾಲಾದರು. Subheading: ಪೋಲಿಸರ ಮಧ್ಯಪ್ರವೇಶ, ಪರಿಸ್ಥಿತಿ ಹತೋಟಿಗೆ ಸಭಾಂಗಣದಲ್ಲಾದ ಈ ಗಲಾಟೆಯ ಮಾಹಿತಿ ತಿಳಿಯುತ್ತಿದ್ದಂತೆ ತಕ್ಷಣವೇ ರಂಗಪ್ರವೇಶ ಮಾಡಿದ ಪೊಲೀಸರು, ಹೊಡೆದಾಟದಲ್ಲಿ ಭಾಗಿಯಾಗಿದ್ದ ಇಬ್ಬರು ರೈತ ಮುಖಂಡರನ್ನು ವಶಕ್ಕೆ ಪಡೆದು ಸಭಾಂಗಣದಿಂದ ಹೊರಗೆ ಕರೆದೊಯ್ದರು. ಪೊಲೀಸರ ಸಮಯೋಚಿತ ಮಧ್ಯಪ್ರವೇಶದಿಂದಾಗಿ ದೊಡ್ಡ ಮಟ್ಟದ ಅನಾಹುತ ತಪ್ಪಿದ್ದು, ಪ್ರಸ್ತುತ ಸಭಾಂಗಣದಲ್ಲಿ ಬಿಗುವಿನ ವಾತಾವರಣ ತಿಳಿಯಾಗಿದೆ.