ಚಿಕ್ಕೋಡಿ: ಬೆಳಗಾವಿ ಜಿಲ್ಲೆಯ ರಾಯಬಾಗ ತಾಲೂಕಿನ ಅಲಕನೂರು ಗ್ರಾಮದ ಪ್ರಸಿದ್ಧ ಕರಿಸಿದ್ದೇಶ್ವರ ಮಠದ ಸಾಕು ಆನೆ 'ಧ್ರುವರಾಜ' (30) ತೀವ್ರ ಅನಾರೋಗ್ಯದಿಂದಾಗಿ ಮಂಗಳವಾರ ಬೆಳಿಗ್ಗೆ ಕೊನೆಯುಸಿರೆಳೆದಿದೆ. ಮಠದೊಂದಿಗೆ ಬರೋಬ್ಬರಿ 25 ವರ್ಷಗಳ ಸುದೀರ್ಘ ವಾತ್ಸಲ್ಯದ ಬಾಂಧವ್ಯ ಹೊಂದಿದ್ದ ಈ ಪ್ರೀತಿಯ ಆನೆಯ ಅಗಲಿಕೆಯಿಂದ ಮಠದ ಆವರಣದಲ್ಲಿ ಹಾಗೂ ಇಡೀ ಗ್ರಾಮದಲ್ಲಿ ನೀರವ ಮೌನ ಆವರಿಸಿದ್ದು, ಸಾರ್ವಜನಿಕರು ಹಾಗೂ ಭಕ್ತರು ಬಿಕ್ಕಿ ಬಿಕ್ಕಿ ಅಳುತ್ತಿರುವ ಹೃದಯವಿದ್ರಾವಕ ದೃಶ್ಯಗಳು ಕಂಡುಬರುತ್ತಿವೆ. ಧ್ರುವರಾಜ ಆನೆಗೆ ಕಳೆದ ಕೆಲವು ದಿನಗಳಿಂದ ತೀವ್ರ ಆರೋಗ್ಯ ಸಮಸ್ಯೆ ಕಾಣಿಸಿಕೊಂಡಿತ್ತು. ಆನೆಯ ಜೀವ ಉಳಿಸಲು ಶಿವಮೊಗ್ಗ ಸೇರಿದಂತೆ ರಾಜ್ಯದ ವಿವಿಧ ಭಾಗಗಳಿಂದ ತಜ್ಞ ಪಶುವೈದ್ಯರನ್ನು ಕರೆಸಿ ಮಠದಲ್ಲೇ ಸುಧೀರ್ಘ ಚಿಕಿತ್ಸೆ ಕೊಡಿಸಲಾಗುತ್ತಿತ್ತು. ಆದರೆ, ವೈದ್ಯರ ಸತತ ಪ್ರಯತ್ನದ ಹೊರತಾಗಿಯೂ ಮಂಗಳವಾರ ಬೆಳಿಗ್ಗೆ ಚಿಕಿತ್ಸೆ ಫಲಕಾರಿಯಾಗದೆ ಆನೆ ಸಾವನ್ನಪ್ಪಿದೆ ಎಂದು ಮಠದ ಮೂಲಗಳು ಹಾಗೂ ವೈದ್ಯಕೀಯ ಸಿಬ್ಬಂದಿ ಸ್ಪಷ್ಟಪಡಿಸಿದ್ದಾರೆ. 25 ವರ್ಷಗಳ ಸುದೀರ್ಘ ಬಾಂಧವ್ಯ: ಸುಮಾರು ಕಾಲು ಶತಮಾನದ ಹಿಂದೆ ಕರಿಸಿದ್ದೇಶ್ವರ ಮಠಕ್ಕೆ ಕರೆತರಲಾಗಿದ್ದ ಧ್ರುವರಾಜ, ಮಠದ ಪ್ರತಿಯೊಂದು ಧಾರ್ಮಿಕ ಕಾರ್ಯಕ್ರಮಗಳು ಹಾಗೂ ಉಚ್ಚಾಯ ಮೆರವಣಿಗೆಗಳಲ್ಲಿ ಪ್ರಮುಖ ಆಕರ್ಷಣೆಯಾಗಿತ್ತು. ಸ್ಥಳೀಯ ನಿವಾಸಿಗಳು ಮತ್ತು ಮಠಕ್ಕೆ ಆಗಮಿಸುತ್ತಿದ್ದ ಭಕ್ತರೊಂದಿಗೆ ವಿಶೇಷ ಪ್ರೀತಿ ಹಾಗೂ ವಾತ್ಸಲ್ಯ ಬೆಳೆಸಿಕೊಂಡಿದ್ದ ಈ ಆನೆಯ ಸಾವು ಇಡೀ ಅಲಕನೂರು ಗ್ರಾಮಸ್ಥರನ್ನು ದುಃಖದ ಮಡುವಿನಲ್ಲಿ ತಳ್ಳಿದೆ. ವಿಷಯ ತಿಳಿಯುತ್ತಿದ್ದಂತೆ ಸಹಸ್ರಾರು ಭಕ್ತರು ಮಠದತ್ತ ಹರಿದುಬರುತ್ತಿದ್ದು, ಅಗಲಿದ ಆನೆಯ ಮೃತದೇಹಕ್ಕೆ ಅಂತಿಮ ನಮನ ಸಲ್ಲಿಸುತ್ತಿದ್ದಾರೆ. ಅರಣ್ಯ ಇಲಾಖೆ ಪರಿಶೀಲನೆ - ಸಂಜೆ ಅಂತ್ಯಸಂಸ್ಕಾರ: ಸುದ್ಧಿ ತಿಳಿಯುತ್ತಿದ್ದಂತೆಯೇ ಅರಣ್ಯ ಇಲಾಖೆಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಹಾರೂಗೇರಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಅಗತ್ಯ ಕಾನೂನು ಹಾಗೂ ಇಲಾಖಾ ಪ್ರಕ್ರಿಯೆಗಳು ಪೂರ್ಣಗೊಳ್ಳುತ್ತಿವೆ.

"ಧ್ರುವರಾಜ ನಮ್ಮ ಮಠದ ಕೇವಲ ಆನೆಯಾಗಿರಲಿಲ್ಲ, ಮಠದ ಕುಟುಂಬದ ಸದಸ್ಯನಂತಿದ್ದ. ವೈದ್ಯರ ಸತತ ಚಿಕಿತ್ಸೆಯ ಹೊರತಾಗಿಯೂ ಅದನ್ನು ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ ಎಂಬುದು ನಮಗೆಲ್ಲ ತೀವ್ರ ನೋವು ತಂದಿದೆ" ಎಂದು ಭಕ್ತರೊಬ್ಬರು ಕಣ್ಣೀರು ಹಾಕಿದರು.

ಮಂಗಳವಾರ ಸಂಜೆ ಮಠಕ್ಕೆ ಸೇರಿದ ಸ್ವಂತ ಜಮೀನಿನಲ್ಲಿ ಧಾರ್ಮಿಕ ವಿಧಿವಿಧಾನಗಳು ಹಾಗೂ ಸಕಲ ಗೌರವಗಳೊಂದಿಗೆ ಧ್ರುವರಾಜನ ಅಂತ್ಯಸಂಸ್ಕಾರ ನೆರವೇರಿಸಲು ಮಠದ ಶ್ರೀಗಳು ಹಾಗೂ ಗ್ರಾಮಸ್ಥರು ಸಕಲ ಸಿದ್ಧತೆ ಕೈಗೊಂಡಿದ್ದಾರೆ.