ಬೆಳಗಾವಿ: ಹುಬ್ಬಳ್ಳಿ ಚಲೋ ಪಾದಯಾತ್ರೆ ನಾಲ್ಕನೇ ದಿನಕ್ಕೆ ಕಾಲಿಟ್ಟಿದ್ದು, ರಾಜ್ಯದಲ್ಲಿ ರೈತ ಹೋರಾಟ ತೀವ್ರಗೊಂಡಿದೆ. ಇದರ ನಡುವೆ, ನಿರಂತರ ಪಾದಯಾತ್ರೆಯಿಂದಾಗಿ ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ರಾಜ್ಯಾಧ್ಯಕ್ಷ ಚೂನಪ್ಪ ಪೂಜಾರಿ ಅವರು ಅಸ್ವಸ್ಥಗೊಂಡು ಸುಸ್ತಾದ ಘಟನೆ ಇಟಗಿ ಗ್ರಾಮದ ಬಳಿ ನಡೆದಿದೆ. ರೈತರ ಹಕ್ಕುಗಳಿಗಾಗಿ ಮತ್ತು ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಒತ್ತಾಯಿಸಿ ಹಮ್ಮಿಕೊಳ್ಳಲಾಗಿರುವ ಈ ಬೃಹತ್ ಪಾದಯಾತ್ರೆಯು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಾಗುತ್ತಿದ್ದ ವೇಳೆ, ಸತತ ನಡಿಗೆಯಿಂದ ಚೂನಪ್ಪ ಪೂಜಾರಿ ಅವರಿಗೆ ಆಯಾಸ ಉಂಟಾಗಿದೆ. ರೈತರಿಂದ ತುರ್ತು ಸ್ಪಂದನೆ: ನಾಯಕನ ಆರೋಗ್ಯದಲ್ಲಿ ಏರುಪೇರಾಗುವುದನ್ನು ಗಮನಿಸಿದ ಸಹ-ರೈತರು ತಕ್ಷಣವೇ ಎಚ್ಚೆತ್ತುಕೊಂಡಿದ್ದಾರೆ. ರಸ್ತೆ ಬದಿಯಲ್ಲಿ ವಿಶ್ರಾಂತಿ ಪಡೆದ ಅವರಿಗೆ ಹಸಿರು ಟವಲ್‌ನಿಂದ ಗಾಳಿ ಬೀಸಿ, ಧೈರ್ಯ ತುಂಬಿದ್ದಾರೆ. ಪ್ರಾಥಮಿಕ ಚೇತರಿಕೆಯ ಬಳಿಕ ಹುಮ್ಮಸ್ಸು ಕಳೆದುಕೊಳ್ಳದ ಚೂನಪ್ಪ ಪೂಜಾರಿ, ಕೆಲಕಾಲ ವಿಶ್ರಾಂತಿ ಪಡೆದು ಮರಳಿ ಪಾದಯಾತ್ರೆಯನ್ನು ಆರಂಭಿಸಿದ್ದಾರೆ.

ಪ್ರತಿಭಟನೆ ಮತ್ತು ಆರೋಗ್ಯದ ಸವಾಲುಗಳ ನಡುವೆಯೂ ರೈತ ಮುಖಂಡರ ಈ ಧೃಢನಿಷ್ಠೆ ಹೋರಾಟಗಾರರಲ್ಲಿ ಹೊಸ ಚೈತನ್ಯ ಮೂಡಿಸಿದೆ.

ಪೊಲೀಸ್ ಬಿಗಿ ಭದ್ರತೆಯೊಂದಿಗೆ ಸಾಗುತ್ತಿರುವ ಈ ಪಾದಯಾತ್ರೆಯು ನಿಗದಿತ ಗುರಿಯತ್ತ ಮುನ್ನುಗ್ಗುತ್ತಿದ್ದು, ಸರ್ಕಾರದ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.