ಬೆಳಗಾವಿ ಗಡಿಯಲ್ಲಿ ‘ಪುಷ್ಪಾ’ ಶೈಲಿಯಲ್ಲಿ ಮೀನು ಸಾಗಣೆ ವಾಹನದಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ ₹35.28 ಲಕ್ಷ ಮೌಲ್ಯದ ಗೋವಾ ಮದ್ಯವನ್ನು ಅಬಕಾರಿ ಪೊಲೀಸರು ಜಪ್ತಿ ಮಾಡಿದ್ದಾರೆ.
BELAGAVI: ಮಹಾರಾಷ್ಟ್ರ ಹಾಗೂ ಕರ್ನಾಟಕ ಗಡಿ ಭಾಗದಲ್ಲಿ ಬ್ಲಾಕ್ಬಸ್ಟರ್ ‘ಪುಷ್ಪಾ’ ಸಿನಿಮಾ ಶೈಲಿಯಲ್ಲಿ ನಡೆಯುತ್ತಿದ್ದ ಬೃಹತ್ ಅಕ್ರಮ ಗೋವಾ ಮದ್ಯ ಸಾಗಾಟ ಜಾಲವನ್ನು ಅಬಕಾರಿ ಇಲಾಖೆ ಅಧಿಕಾರಿಗಳು ಯಶಸ್ವಿಯಾಗಿ ಭೇದಿಸಿದ್ದಾರೆ. ಮೀನು ಸಾಗಣೆ ಮಾಡುವ ಕೋಲ್ಡ್ ಸ್ಟೋರೇಜ್ ವಾಹನದಲ್ಲಿ ರಹಸ್ಯವಾಗಿ ಮದ್ಯದ ಬಾಕ್ಸ್ ಇಟ್ಟು ಸಾಗಿಸುತ್ತಿದ್ದ
₹35.28 ಲಕ್ಷ ಮೌಲ್ಯದ ಅಕ್ರಮ ಮದ್ಯ ಹಾಗೂ
₹20 ಲಕ್ಷ ಮೌಲ್ಯದ ವಾಹನವನ್ನು ಜಪ್ತಿ ಮಾಡಲಾಗಿದೆ.
‘ಪುಷ್ಪಾ’ ಶೈಲಿಯಲ್ಲಿ ಸಾಗಾಟ, ಅಬಕಾರಿ ಪಡೆ ದಾಳಿ:
ಖಚಿತ ಮಾಹಿತಿ ಆಧರಿಸಿ ಕಾರ್ಯಾಚರಣೆ ನಡೆಸಿದ ಅಬಕಾರಿ ಅಧಿಕಾರಿಗಳ ತಂಡವು ಬೆಳಗಾವಿಯ ವೈಭವ ಹೋಟೆಲ್ ಸಮೀಪದ ಬಾಜಿ ರಸ್ತೆಯಲ್ಲಿ ಅನುಮಾನಾಸ್ಪದವಾಗಿ ಚಲಿಸುತ್ತಿದ್ದ
'ಒಸಿಯನ್ ಫಿಶರ್ಸ್' (Ocean Fishers) ಹೆಸರಿನ ಕೋಲ್ಡ್ ಸ್ಟೋರೇಜ್ ವಾಹನವನ್ನು ತಡೆದು ತಪಾಸಣೆ ನಡೆಸಿದೆ. ಮೇಲ್ನೋಟಕ್ಕೆ ವಾಹನದ ಹೊರಭಾಗದಲ್ಲಿ ಮೀನು ತುಂಬಿದ್ದ ಟ್ರೇಗಳನ್ನು ಜೋಡಿಸಿ, ಒಳಭಾಗದಲ್ಲಿ ಚಾಲಾಕಿತನದಿಂದ ಮದ್ಯದ ಬಾಕ್ಸ್ಗಳನ್ನು ಬಟಾವಣೆ ಮಾಡಲು ಬಾಂಕ್ಸ್ ಇಡಲಾಗಿತ್ತು. ಅಧಿಕಾರಿಗಳು ತಪಾಸಣೆ ಆರಂಭಿಸುತ್ತಿದ್ದಂತೆ ಖದೀಮರು ವಾಹನವನ್ನು ಸ್ಥಳದಲ್ಲೇ ಬಿಟ್ಟು ಪರಾರಿಯಾಗಿದ್ದಾರೆ.
ವಶಪಡಿಸಿಕೊಂಡ ಮದ್ಯ ಹಾಗೂ ವಾಹನದ ಮೌಲ್ಯ:
ಅಬಕಾರಿ ಪಡೆ ನಡೆಸಿದ ಸುದೀರ್ಘ ಪರಿಶೀಲನೆ ವೇಳೆ ವಾಹನದಲ್ಲಿದ್ದ 180 ಎಂಎಲ್ ಅಳತೆಯ ಒಟ್ಟು
350 ಬಾಕ್ಸ್ ‘ಬಿಗ್ ಬಾಸ್’ ಬ್ರಾಂಡಿ ಮದ್ಯದ ಬಾಟಲಿಗಳು ಪತ್ತೆಯಾಗಿವೆ. ಇವುಗಳ ಒಟ್ಟು ಮಾರುಕಟ್ಟೆ ಮೌಲ್ಯ
₹35,28,000 ಎಂದು ಅಂದಾಜಿಸಲಾಗಿದೆ. ಇದರೊಂದಿಗೆ ಅಕ್ರಮ ಸಾರಿಗೆಗೆ ಬಳಸಿದ್ದ
₹20 ಲಕ್ಷ ಮೌಲ್ಯದ ಕೋಲ್ಡ್ ಸ್ಟೋರೇಜ್ ವಾಹನವನ್ನೂ ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ.
ಆರೋಪಿಗಳಿಗಾಗಿ ಮುಂದುವರಿದ ಶೋಧ:
ಗೋವಾದಿಂದ ಕರ್ನಾಟಕ ಹಾಗೂ ಮಹಾರಾಷ್ಟ್ರ ಭಾಗಕ್ಕೆ ತೆರಿಗೆ ವಂಚಿಸಿ ಅಕ್ರಮವಾಗಿ ಮದ್ಯ ಸರಬರಾಜು ಮಾಡುವ ಜಾಲ ಸಕ್ರಿಯವಾಗಿರುವುದು ಈ ದಾಳಿಯಿಂದ ಮತ್ತೊಮ್ಮೆ ಸ್ಪಷ್ಟವಾಗಿದೆ.
"ಮೀನು ಸಾಗಣೆ ಸೋಗಿನಲ್ಲಿ ಅಕ್ರಮವಾಗಿ ಮದ್ಯ ತರುತ್ತಿದ್ದ ಜಾಲದ ಮೂಲವನ್ನು ಪತ್ತೆಹಚ್ಚಲಾಗುತ್ತಿದೆ. ವಾಹನ ಬಿಟ್ಟು ಪರಾರಿಯಾಗಿರುವ ಆರೋಪಿಗಳಿಗೆ ಜಾಲ ಬೀಸಲಾಗಿದ್ದು, ಶೀಘ್ರದಲ್ಲೇ ಅವರನ್ನು ಬಂಧಿಸಲಾಗುವುದು"
ಎಂದು ಅಬಕಾರಿ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಈ ಸಂಬಂಧ ಅಬಕಾರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಚುರುಕುಗೊಂಡಿದೆ.