NEW ORLEANS: ಅಮೆರಿಕದ ಲುಸಿಯಾನಾ ರಾಜ್ಯದ ನ್ಯೂ ಓರ್ಲೀನ್ಸ್ ಬಂದರು ಸಮೀಪದ ಮಿಸಿಸಿಪ್ಪಿ ನದಿಯಲ್ಲಿ ಭೀಕರ ನೌಕಾ ಅಪಘಾತವೊಂದು ಸಂಭವಿಸಿದೆ. ಬಂದರಿನ ದಂಡೆಯಲ್ಲಿ ನಿಲುಗಡೆಗೊಂಡಿದ್ದ American Heritage ಎಂಬ ನದಿ ಕ್ರೂಸ್ ಹಡಗಿಗೆ Atlantic Asphalt ಎಂಬ ಬೃಹತ್ ಕಾರ್ಗೋ ಟ್ಯಾಂಕರ್ ರಭಸವಾಗಿ ಡಿಕ್ಕಿ ಹೊಡೆದಿದ್ದು, ಪರಿಣಾಮವಾಗಿ ಕ್ರೂಸ್ ಹಡಗು ನೀರಿನಲ್ಲಿ ಭಾಗಶಃ ಮಗುಚಿಕೊಂಡಿದೆ. ಹಡಗಿನಲ್ಲಿದ್ದ ಸುಮಾರು 200 ಪ್ರಯಾಣಿಕರು ಹಾಗೂ ಸಿಬ್ಬಂದಿ ಪವಾಡಸದೃಶವಾಗಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಶುಕ್ರವಾರ ಮಧ್ಯಾಹ್ನ ಸುಮಾರು 12:30ರ ವೇಳೆಗೆ Port of New Orleans ಬಂದರಿನ ಸಮೀಪ ಈ ದುರಂತ ಸಂಭವಿಸಿದೆ. ಕ್ರೂಸ್ ಹಡಗು ಬಂದರಿನಲ್ಲಿ ನಿಂತಿದ್ದು, ಪ್ರಯಾಣಿಕರು ಕೆಳಗಿಳಿಯುತ್ತಿದ್ದ ಸಮಯದಲ್ಲೇ ಬಂದ ಬೃಹತ್ ಟ್ಯಾಂಕರ್ ಅಪಘಾತ ಎಸಗಿದೆ. ಡಿಕ್ಕಿಯ ತೀವ್ರತೆಗೆ ಕ್ರೂಸ್ ಹಡಗು ಒಂದು ಬದಿಗೆ ವಾಲಿ ಮುಳುಗತೊಡಗಿತು. ಇದರಿಂದಾಗಿ ಹಲವು ಪ್ರಯಾಣಿಕರು ನೀರಿಗೆ ಬಿದ್ದು ಆಹಾಕಾರ ಸೃಷ್ಟಿಯಾಗಿತ್ತು. ತ್ವರಿತ ರಕ್ಷಣಾ ಕಾರ್ಯಾಚರಣೆ: ಘಟನೆ ತಿಳಿಯುತ್ತಿದ್ದಂತೆಯೇ U.S. Coast Guard, ನ್ಯೂ ಓರ್ಲೀನ್ಸ್ ಅಗ್ನಿಶಾಮಕ ದಳ, ಪೋಲಿಸ್ ಇಲಾಖೆ ಹಾಗೂ Port NOLA ಹಾರ್ಬರ್ ಪೊಲೀಸರು ಕ್ಷಿಪ್ರ ರಕ್ಷಣಾ ಕಾರ್ಯಾಚರಣೆಗೆ ಧುಮುಕಿದರು. ಸಮೀಪದಲ್ಲಿದ್ದ ಇತರೆ ಸಣ್ಣ ದೋಣಿಗಳು ಸಹ ತಕ್ಷಣವೇ ನೆರವಿಗೆ ಧಾವಿಸಿ ನೀರಿಗೆ ಬಿದ್ದವರನ್ನು ಸುರಕ್ಷಿತವಾಗಿ ದಡಕ್ಕೆ ಕರೆತಂದವು. ಅಪಘಾತದಲ್ಲಿ ಗಾಯಗೊಂಡ 32 ಮಂದಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಯಾರಿಗೂ ಪ್ರಾಣಾಪಾಯವಿಲ್ಲ ಎಂದು ವೈದ್ಯಕೀಯ ಸಿಬ್ಬಂದಿ ಸ್ಪಷ್ಟಪಡಿಸಿದ್ದಾರೆ. ರಕ್ಷಣಾ ಕಾರ್ಯದಲ್ಲಿದ್ದ ಇಬ್ಬರು ಪೊಲೀಸ್ ಅಧಿಕಾರಿಗಳಿಗೂ ಸಣ್ಣಪುಟ್ಟ ಗಾಯಗಳಾಗಿದ್ದು ಚಿಕಿತ್ಸೆ ನೀಡಲಾಗಿದೆ. ನ್ಯೂ ಓರ್ಲೀನ್ಸ್ ಮೇಯರ್ ಹೆಲೆನಾ ಮೊರೆನೋ (Helena Moreno) ಈ ಯಶಸ್ವಿ ರಕ್ಷಣಾ ಕಾರ್ಯಾಚರಣೆಯನ್ನು ಕೊಂಡಾಡಿದ್ದು,

"ಹಡಗಿನಲ್ಲಿದ್ದ ಪ್ರತಿಯೊಬ್ಬರನ್ನು ಸುರಕ್ಷಿತವಾಗಿ ಹೊರತೆಗೆಯಲಾಗಿದ್ದು, ಯಾವುದೇ ಜೀವಹಾನಿಯಾಗದಿರುವುದು ಮಿಸಿಸಿಪ್ಪಿ ನದಿಯ ಮೇಲೆ ನಡೆದ ದೊಡ್ಡ ಅದ್ಭುತ"

ಎಂದು ಬಣ್ಣಿಸಿದ್ದಾರೆ. ತನಿಖೆ ಆರಂಭಿಸಿದ NTSB: ಕಾರ್ಗೋ ಟ್ಯಾಂಕರ್ ತಾಂತ್ರಿಕ ದೋಷದಿಂದ ನಿಯಂತ್ರಣ ಕಳೆದುಕೊಂಡಿತ್ತೇ ಅಥವಾ ಮಾನವ ಸಹಜ ತಪ್ಪಿನಿಂದ ಈ ದುರಂತ ಸಂಭವಿಸಿದೆಯೇ ಎಂಬುದರ ಕುರಿತು ಅಮೆರಿಕದ National Transportation Safety Board (NTSB) ಹಾಗೂ ಸಮುದ್ರ ಸಾರಿಗೆ ಅಧಿಕಾರಿಗಳು ತನಿಖೆ ಆರಂಭಿಸಿದ್ದಾರೆ. ಮುನ್ನೆಚ್ಚರಿಕಾ ಕ್ರಮವಾಗಿ ಮಿಸಿಸಿಪ್ಪಿ ನದಿಯ ಈ ಭಾಗದಲ್ಲಿ ಹಡಗು ಸಂಚಾರವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ.